Flash News
Mail RSS
Quezon Province
Loading...

KAHANDAAN SA MGA POSIBLENG KALAMIDAD AT SAKUNA, PATULOY NA PINAGTITIBAY SA BARANGAY BARRA AYON KAY KAPITAN AMY SOBREVIÑAS

“Minamarapat po na ang aming proteksyon at kahandaan sa mga posibleng kalamidad ay patuloy pang dadadagdagan at pagtitibayin”, ito ang inilahad ni Kapitan Amy Sobreviñas hinggil sa usapin ng disaster preparedness.

Dahil na din sa nabibilang aniya ang Barangay Barra sa mga nasa coastal area sa lungsod at hindi rin naman inaasahan kung kailan may mangyayaring sakuna o kalamidad sa barangay ay kinakailangan ng barangay ng proteksyon para dito.

Upang mas masiguro na rin ang kaligtasan ng mga mamamayan sa kanilang komunidad.

Dagdag pa nito, patuloy nilang pinaghahandaan at pinag-aaralan ang mga posibleng paraan at gawain sakaling dumating ang mga nabanggit na insidente.

Sa katunayan nga aniya ay nagsagawa na sila ng mga trainings na kinalahukan ng lahat ng mga miyembro ng sangguniang barangay kasama ang mga barangay tanod at purok leaders.

Ito ay para magkaroon sila ng kamalayan at kaalaman sa mga precautionary measures, mga dapat na hakbangin at mga bagay na isasaalang-alang sa kasagsagan ng kalamidad at mga gagawin matapos ito.

Ang Barangay Barra naman aniya ay magroong tinatawag na outlet dahilan sa napaggigitnaan ito ng dalawang uri ng katubigan, ang ilog at dagat na kung saan ay may lalabasan ang mga tubig kung sakali mang bahain ito.

Nakahanda din ang kanilang evacuation plan kung sakaling kinakailangang lumikas ng mga mamamayan, makikita sa mga daanan sa barangay ang mga karatula na nakalagay kung saan magtutungo ang mga ito sa panahon ng paglikas.

Mas mainam pa rin aniya na may panangga dahilan sa nakapaghanda kaysa umano sa mabibigla na lamang sa pagdating ng mga insidente.

Para naman kay Sobreviñas, sa patuloy na pagtutulungan ng local government unit kabilang ang lahat ng mga namumuno sa lahat ng barangay sa lungsod kaisa ang Lucena City Disater Risk Reduction and Management ay mapapanatili ang kaligtasan ng lahat ng mga mamamayang Lucenahin. (PIO-Lucena/M.A. Minor)