Flash News
Mail RSS
Quezon Province
Loading...

KONSEHAL SUNSHINE ABCEDE-LLAGA, HINILING ANG MAHIGPIT NA PAGPAPATUPAD SA RA 9344 O JUVENILE JUSTICE LAW


Pagtulung-tulungan sana natin ang mahigpit na pagpapatupad ng Republic Act 9344 o Juvenile Justice Law bago pa man ito baguhin.
Ito ang naging pahayag ni Konsehal Sunshine Abcede-Llaga, chairperson ng Committee on Social Welfare, sa kanyang isinagawang pribilehiyong pananalita sa idinaos na regular na sesyon kamakailan.
Kaugnay ito sa panukalang ibababa ang edad ng mga batang maaaring panagutin sa batas, mula sa edad labinglimang taon ay magiging labindalawang taon na lamang ito.
Kung kaya’t hinihikayat ng konsehala ang iba pang mga miyembro ng konseho na mas pag-aralan pa at unawain ang Juvenile Justice Law na siyang umiiral na batas sa kasalukuyan upang mapag-isipan na rin kung nararapat lang ba at napapanahon ang panukalang baguhin ito.
Ayon sa inilahad ni Llaga, ang naturang batas aniya at nakabase sa prinsipyong restorative justice na hindi nagsasabing walang kaparusahang ibibigay sa mga batang nagkamali.
Dagdag pa nito, wala aniyang magulang ang naniniwalang hindi dapat itama ang maling ginagawa ng isang anak. Bagkus ito pa ay naghahangad ng hustisya para sa biktima, pagkakasundo ng biktima at batang nagkasala at muling integrasyon ng bata sa lipunan.
Inilahad din nito ang ilan sa mga aspetong nakapailalim sa nabanngit na batas tulad ng pagkakaroon ng komprehensibong polisiya at proseso ng mga ahensya ng pamahalaan tulad ng DOJ, DSWD, DepED, DILG, NYC at iba pa, para sa mga batang nagkasala sa batas.
Gayundin ang bawat local government unit kasama ang bawat barangay ay dapat mayroong Konseho para sa proteksyon ng mga kabataan kaisa ng kanilang Juvenile Intervention program.
Nakapaloob din dito ang pagkakaroon ng youth detention homes, agricultural camps, training facilities at youth rehabilitation centers at mga social workers na magbibigay tulong sa mga kabataan at sa knailang pamilya.
Ngunit, ayon kay Llaga, tila bigo ang batas sa pagtugon ng isyu hinggil sa mga kabataan.
Dahilan na rin aniya sa patuloy na paglutang ng mga krimen na sangkot ang kabataan, taong 2013 ay binago ang RA 9344 na nagsasaad ng pagkakaroon ng Bahay Pag-asa na magbibigay ng malalimang pamamagitan at suporta sa mga Children in conflict with the law.
Ayon pa sa Konsehal, ang mga batang napatunayang gumawa ng mabigat na krimen tulad ng pagpatay, panggagahasa at paglabag sa comprehensive drugs act ay kinakailangang dalhin sa bahay pag-asa upang magabayan at subukan na baguhin ang takbo ng kanilang pamumuhay.
Binigyang pansin rin ni Llaga ang usapin kung sapat nga ba ang bahay pag-asa na mayroon ang bansang Pilipinas sa kasalukuyan.
Ayon sa datos, tinatayang nasa limampu’t limang bahay pag-asa lamang ang mayroon sa bansa na matatagpuan lamang sa mga major cities.
Sa  huli ay ninanais nito ang masusing pag-aaral at mahigpit na pagpapatupad sa batas na pinaiiral ngayon sa bansa, ang RA 9344 o Juvenile Justice Law. (PIO-Lucena/M.A. Minor)