Flash News
Mail Instagram YouTube YouTube
CALABARZON

CITY ADMINISTRATOR ANACLETO “JUN” ALCALA JR., PINURI ANG NAGING ACCOMPLISHMENT NG CITY AGRICULTURIST OFFICE


 Sa ginanap na regular na flag raising ceremony kamakailan sa pangunguna ng City Agriculturist Office na nagsilbing host ng programa, nagbigay ng mensahe si City Administrator Anacleto “Jun” Alcala Jr..

Sa naging pahayag ni City Admin, pinuri nito ang tanggapan ng panlungsod na agrikultura lalo’t higit ang hepe nito na si Melissa Letargo dahilan sa kahit madami aniya ang sangay na hawak nito ay walang dudang kaniyang naisakatuparan ang kanilang lahat ng mga programa at proyekto.
Kabilang na aniya dito ang mabilis na pagkilos ng tanggapan noong panahon na bumulusok pataas ang presyo ng bigas sa merkado.
Matatandaang noong buwan ng Oktubre ng nakaraang taon ay umabot sa limampu’t apat na piso ang presyo ng bigas kada kilo.
Pahayag pa ng panlungsod na administrador, bilang pagtugon sa kaganapang ito, inatasan ng punong lungsod ng Lucena na si Mayor Roderick “Dondon” Alcala si Letargo gayundin ang punong barangay ng Barangay Ibabang Talim na si Kapitan Rolando Ebreo na isaayos at pagandahin ang operasyon ng rice processing center na matatagpuan sa naturang barangay.
Kasabay rin aniya ng atas na ito ay ang pagsusumikap na makagpaglabas ng kaukulang dami ng bigas na kinakailangan ng mga mamamayan sa loob ng dalawang linggo.
Ang mga bigas naman na ito ay ang siyang ipinamahagi at ipinagbenta sa mababang halaga sa mga Lucenahin na residente ng Brgy. Ibabang Talim gayundin ng Brgy. Ilayang Talim sa pamumuno ni Kapitan Darwin Sevilla.
Magmula aniya sa limampu’t apat na piso sa merkado ay naibenta nila ang mga bigas ng nagkakahalaga na lamang ng apat napu’t limang piso kada kilo, na nangangahulugang nakatipid ang bawat pamilya na siyam na piso kada kilo ng bigas na kanilang binili.
Bagay na maituturing na isang malaking tulong para sa mga mamamayan sa lungsod.
Sa huli ay inaasahan ang patuloy na pagsasagawa at pagpapatupad ng mga programa at proyekto ng City Agriculturist Office.  (PIO-Lucena/ M.A. Minor)

Loading...