November 16, 2019 LUNGSOD NG LUCENA, Quezon - Kasabay ng pag-oorganisa at pagsasagawa ng Commission on Population ng iba’t ibang programan...
LUNGSOD NG LUCENA, Quezon - Kasabay ng pag-oorganisa at pagsasagawa ng Commission on Population ng iba’t ibang programang tutulong sa mga pamilyang Pilipino na mas magkaroon ng kaalaman sa tamang pagpaplano ng bubuuing pamilya, inilunsad din ng nasabing tanggapan ang Philippine population management program o PPMP.
Ang PPMP ang itunuturing na mapa na siyang gagabay pagdating sa suliranin hinggil sa populasyon at kaunlaran. Hinihikayat kasi ng programang ito na maging matalino ang bawat mag-asawa pagdating sa family planning na siyang tutugma sa kanilang kakayahang pinansyal, sikolohikal at pisikal. Ika nga, ang maunlad na bansa ay nagsisimula sa planadong pamilya.
Tila isang cycle naman ang ipinakitang deskripsyon ng Popcom para sa PPMP. Nakasaad dito na dahil sa maayos at pinagplanuhang bilang ng miyembro ng bawat pamilya, makakatulong ito sa pagkakaroon ng masayang komunidad na siyang magbibigay dahilan naman para mapataas ang pagkakataon ng bawat mamamayan na mas paunlarin pa ang kanilang mga sarili.
Sa pagkakataong ito, uusbong ang maganda at maayos na imahe ng isang pamayanan at posibleng tumaas ang bilang ng job opportunities and services at mas mapapaigting ang aspeto ng edukasyon. Gayundin, binibigyang halaga rin sa programa ang responsible parenthood and family planning, adolescent health and development na gagabay sa mga kabataan, population and development integration at empowered Filipino families. (PIO-Lucena/M.A. Minor)
No comments