Lupon tagapamayapa ng Barangay Marketview nagwagi sa LTIA 2021 Regional Level

by PIO Lucena/Josa Cruzat July 23, 2021 Kapitan Edwin Napule (File Photo) LUCENA CITY - Muling kinilala ang Lupon Tagapamayapa ng Barangay M...

by PIO Lucena/Josa Cruzat
July 23, 2021

Kapitan Edwin Napule (File Photo)

LUCENA CITY - Muling kinilala ang Lupon Tagapamayapa ng Barangay Marketview sa Regional Level ng Lupon Tagapamayapa Incentives Awards 2021.

Dito ay muling pinatunayan ng naturang lupon ang mahusay na pagpapatakbo ng kanilang Katarungang Pambarangay kaya naman ito ay tinanghal na kampyon sa kategoryang Highly Urbanized City sa naturang paggawad.



Kaugnay nito buong kagalakang ipinagmamalaki ng Pamahalaang Pambarangay sa pangunguna ni Kapitan Edwin Napule ang patas at walang kinikilingang sistemang pangkatarungan ng barangay.

Ang muling paggawad na ito ay nagpapakita lamang ng epektibo at organisadong lupon tagapamayapa sa usapin ng tamang pagbabalangkas ng mga hakbang at pamamaraan sa pag-settle ng mga reklamo na siyang nagbibigay daan sa kahusayan nito sa pagsulong ng katarungan.



Magiging daan at lakas din ng barangay ang patuloy na pagsungkit nito sa naturang parangal upang maipagpatuloy ng lupon ang maayos na pagpapatakbo ng Katarungang Pambarangay gayundin sa maigting na ebalwasyon at pagpaplano na kanilang isinasagawa sa bawat buwanang pagpupulong.

Magugunitang nasungkit din ng Lupon Tagapamayapa ng Barangay Marketview ang kaparehong parangal sa regional level noong taong 2018, kampyon sa lokal na LTIA simula 2014 hanggang 2021, at hinirang na Hall of Famer sa buong lungsod noong taong 2020.



Samantala, kinikilala ng Department of the Interior and Local Government at Department of Justice sa pamamagitan ng naturang paggawad ang mga barangay na may pinakamagaling na programa hinggil sa Barangay Justice System gayundin ay upang palakasin ang mga Lupon Tagapamayapa sa buong bansa.