2 magsasakang pinaslang sa Sampaloc Quezon, hinatid na sa huling hantungan; martsa-libing, dinaluhan ng 400 kabaryong nananawagan ng hustisya

by Tanggol Magsasaka Timog Katagalugan November 27, 2021 Ang pag-lilibing sa dalawang magsasaka. SAMPALOC, Quezon - Na-ilibing na ang dalawa...

by Tanggol Magsasaka Timog Katagalugan
November 27, 2021


2 magsasakang pinaslang sa Sampaloc Quezon, hinatid na sa huling hantungan; martsa-libing, dinaluhan ng 400 kabaryong nananawagan ng hustisya
Ang pag-lilibing sa dalawang magsasaka.



SAMPALOC, Quezon - Na-ilibing na ang dalawang magsasaka na sina Jorge Coro-nacion at Arnold Buri na brutal na pinatay diumano ng 59th Infantry Battalion, Philippine Army noong Nobyembre 17, 2021.

“Lubhang nakalulungkot ngunit nagngangalit ang pamilya at taong baryo sa barangay Taquico, Sampaloc, Quezon sa mahigit 400 kataong naghatid sa kanila sa huling hantungan” pahayag ni Orly Marcellana, Pangrehiyong Tagapag-Ugnay ng Tanggol Magsasaka Timog Katagalugan.



Pinaslang ng mga sundalo sina Jorge Coronacion at Arnold Buri at pinaratangang mga myembro ng New People’s Army (NPA) na kanilang diumanong naka-engkentro sa isang palitan ng putukan. Subalit mariing pinasisinungalingan ito ng kanilang pamilya at taong baryo na higit nakakakilala sa dalawa.

“Papaanong magiging NPA si Jorge na isa ng senior citizen at may deprensya sa mata (katarata) at si Arnold na ikatlong henera-syon ng tenante ng lupa ni Mayor Devanadera ng Sampaloc, Quezon?” giit ng tagapag-salita.



Umigting ang panawagang “hustisya” mula nang manlumo ang mga mamamayang Sampalukin sa naging tindig ni Mayor Gelo Devanadera, punongbayan ng Sampaloc, na pumaabor sa pahayag ng militar at walang aksyon para imbistigahan at palitawin ang katotohanan sa pangyayari.

“Una, 7:00 ng gabi nasa bahay pa nila si Arnold Buri kabaliktaran sa pahayag ng militar na mahigit 5:00 ng hapon ng sila ay mapatay. Ikalawa, walang nakarinig na putukan sa naturang lugar at walang maipapakitang tama ng bala sa paligid para patunayang may engkwentrong naganap ayon sa pahayag ng mga kapamilya” paliwanag ni Marcellana.



“Sir pasensya na po, bagamat nakumpirma na nga po natin, na sa lupain pala ng aming pamilya nagtatrabaho ang isa sa napatay, wala po akong binanggit na siya ay walang kinalaman sa NPA. Sana po ay malinawan kayo sa mga reports. Kahit sa report ng Inquirer, wala po ako binanggit na hindi sila NPA. Salamat po” ayon ito sa isang komento ni Mayor Devanadera sa post ng Tanggol Magsasaka-Timog Katagalugan page, noong Nobyembre 19, 2021.

“Mayor, ikatlong henerasyon na po ng pagiging tenante si Arnold Buri sa inyong lupain mula pa sa kanyang lolo/mamay. Kundi ninyo kilala si Arnold at hindi ninyo siya kayang ipagtanggol sa mga akusasyon ay dapat din kayong magpaliwanag kung bakit kayo nagkukupkop ng isang NPA?” Dagdag pa ni Marcellana.

Samantala, nagpapasalamat naman ang kapamilya at Tanggol Magsasaka Timog Katagalugan sa ginawang resolusyon #2372 ng Makabayan Bloc sa kongreso sa pangunguna ni Congresswoman Eufemia Cullamat para imbestigahan ng komite ng karapatang pantao ng kongreso ang naganap na pagpatay kina Jorge Coronacion at Arnold Buri. Tumugon din ang Komisyon ng Karapatang Pantao (CHR) Region 4A na magsasagawa sila ng isang independent investigation.

“Kaisa ang Tanggol Magsasaka-Timog Katagalugan sa panawagang Hustisya ng mga kapamiya at kababaryo nila Coronacion at Buri at patuloy na pagkalampag sa tanggapan ni Mayor Gelo Devanadera, Gobernador Danilo Suarez at Congressman Mark Enverga na agad gumawa ng hakbang para sa hustisya sa mga biktima ng pagpatay ng militar. Ngayon sila kailangan ng ating mga kapatid na magsasaka at kababayan na umaksyon at magsalita hindi lamang sa panahon ng eleksyon para manloko sa mga taongbayan at kapag muling nakaupo sa poder ay isang kahoy na hindi nagbibigay ng lilim at nararapat na putulin at ipanggatong” panapos na pananalita ni Orly Marcellana.

Related

Quezon Province 5032844541842215931

Post a Comment

emo-but-icon

Follow Us

Health

Total Pageviews

Latest News

Hot

Comments

Advertisement

About Us

Sentinel Times is Quezon Province #1 Regional Weekly Newspaper. We're in print, website, and radio. We will bring you the latest news and updates.

Connect Us

Sentinel Times Quezon Province Regional Weekly Newspaper is published at 0944 Enverga Boulevard, Manuel S. Enverga University Foundation, Site Village, Barangay Ibabang Dupay 4301 Lucena City, Quezon Province, Philippines. Cellphone# (Smart) 09190001601 / (Globe) 09279385896

Advertisement

item