by Ruel Francisco August 24, 2021 LUNGSOD NG TRECE MARTIRES, Cavite - Inihayag ni Silang Mayor Corrie Poblete sa pamamagitan ng kanyang FB ...
August 24, 2021
LUNGSOD NG TRECE MARTIRES, Cavite - Inihayag ni Silang Mayor Corrie Poblete sa pamamagitan ng kanyang FB Page na naitala kahapon ang pangatlong kaso ng COVID-19 Delta variant sa kanilang bayan.
Ayon sa post ni Mayor Poblete, ang pasyente ay na-confine sa isang ospital sa Maynila noong buwan ng Hulyo. Napag-alaman ng lumabas ang resulta ng swabtest ay nagpositibo sa RTPCR Covid Test at verified ng genome test bilang Delta variant.
Nakauwi sa Silang ang nagpositibo noong ika-11 ng Agosto at kasalukuyang nasa isolation upang mag-quarantine habang tinatayang siyam (9) na close contacts nito ang nag-positibo rin at kasalukuyang naka-quarantine na.
"Agad ko pong ipinag-utos na magsasagawa ng vaccination drive ang ating mga rural health unit (RHU) nurses katuwang ang aking tanggapan sa Barangay Ulat sa lalong madaling panahon dahil sa patuloy na pagtaas ng kaso ng sakit sa nasabing lugar," ayon pa kay Poblete.
Kasabay nito, nagsagawa rin ng mass testing sa iba pang close contacts ng pasyente at sa may sintomas na nararamdaman.
"Patuloy ko pong pinapakausap na mag-ingat at huwag po tayong mag-panic dahil agaran po natin itong inaaksyunan. Panatilihin ang pagsusuot ng face shield, facemask at magkaroon social distancing upang hindi na kumalat ang sakit. Palagi ko pong paalala na manatili na lamang po tayo sa bahay kung hindi naman kinakailangan!" paalala ni Poblete sa mga residente.
"Keep safe and God Bless mga ka-Silangueños," (RBF, PIA Cavite at ulat mula sa Corie Poblete FB Page)
No comments